Klein Karoo Nasionale Kunstefees

Die Klein Karoo Nasionale Kunstefees (KKNK) is Suid-Afrika se Afrikaanse Moederfees. Dié fees is sedert 1995 ’n instelling op die kunstefees-kalender, met ’n program wat alle genres in die uitvoerende kunste, sowel as visuele kuns, insluit. 

Sedert die COVID-19-pandemie die wêreld getref het, het die KKNK sy virtuele skoene aangetrek, met aanlyn vermaak wat regoor Suid-Afrika – trouens, die wêreld! – geniet kan word.

Die fees bied vermaak vir die hele gesin en teiken nie slegs besoekers aan die magiese Klein-Karoo nie, maar ook die mense van Oudtshoorn en omstreke, die Oos-Kaapse Karoo en Tuinroete met verskeie gemeenskapsprojekte. 

Skud jou vere reg vir gasvryheid, natuurskoon, en jolige samesyn – selfs al vier jy (vir nou) fees op jou rekenaar, TV of slimfoon.

#KKNKoraloor