SAMESYN DAMES TEE

Ter viering van Vrouemaand nooi ons jou hartlik na die Samesyn Dames-tee – ’n besondere oggend wat opgedra word aan die vroue wat ’n waardevolle rol in ons skoolgemeenskap speel.

Hierdie geleentheid word deur ons Ouerkomitee as ’n fondsinsamelingsprojek ten bate van die skool aangebied. Van ma’s en oumas tot vriendinne, huisengele en ander besondere vroue in die lewens van ons kinders – hierdie geleentheid bied ’n kans om saam te kuier, te ontspan en ’n welverdiende oggend van bederf te geniet. Dit is werklik ’n bederf met ’n doel.

Die oggend word aangebied by Jesus Sentraal, die kerk waar ons skool gevestig is. Met jou aankoms sal jy verwelkom word met iets koud en borrelend, waarna jy kan uitsien na ’n hoëtee-styl verskeidenheid soet en sout lekkernye.

Ons seremoniemeester vir die oggend is Juanli Theron, medeskrywer van die boek Meer as net ’n Ma. Met haar warmte en humor sal sy ons deur die program neem. Ons is ook bevoorreg om Alicia Buckle as gasspreker te verwelkom. Alicia is ’n inspirerende sakevrou en ma van drie klein seuntjies. Sy sal haar persoonlike insigte, ervarings en inspirerende verhaal met ons deel.

Daar sal genoeg tyd wees om saam met vriendinne te kuier, nuwe mense te ontmoet en die oggend se bederf te geniet. Daarna sal die dames in kleiner groepe verdeel vir ’n reeks sorgvuldig saamgestelde ervarings – van suurdeegbrood bak en blommerangskikking tot ’n essensiële-olies-werkswinkel.

Kom geniet ’n oggend van samesyn, inspirasie en bederf – ’n viering van die vroue wat ons skoolgemeenskap elke dag besonders maak.